【Now財經台】特步國際(01368)「雙11」銷售令市場失望，雖然主品牌提供更多折扣，但銷售增長仍不似預期，一眾大行隨即「大合唱」睇淡特步，集團亦跟手下調今年收入及盈利預測，由原來增長最多20%降至僅增長10%。
華盛證券財富管理部董事李偉傑認為，內地體育用品行業競爭愈趨激烈，特步嘅銷售渠道庫存目標已由第2季嘅少於5個月，改為4.5至5個月，相信為咗去庫存，公司未來嘅折扣力度只會有增無減，今年好難維持到中期逾42%嘅毛利率。
特步股價昨日(13日)已跌咗6%，今日更出現大陰燭，低開0.7%後股價隨即插水，一度急瀉近21%，低見5.32元，收市仍要跌16%。
Jason表示，參考同業李寧(02331)近期表現，上月尾公布不符預期嘅第3季數據，並調低全年收入指引後，股價曾大裂口插水逾20%，佢預期，特步股價會繼續受壓，至少要過多兩日先會喘定，估計跌至5元水平開始有承接，可以趁機博一轉反彈，但短期就好難轉勢。
