【Now財經台】港鐵公司(00066)股價今日(3日)顯著受壓，最多曾跌5%並低見28.35元。花旗最新將公司評級由「買入」降至「沽售」，話港鐵項目喺2023年接連流標，反映發展商憂慮樓市前景，並估計港鐵未來招標會大減甚或唔收「入場費」（即前期費用），係咪會對港鐵股價有好大影響？
南華金融集團高級分析師莫灝楠表示，如果唔收「入場費」，意味港鐵地產收入會減少，加上零售市道唔好，公司要面對減租措施導致租金收入減少嘅問題，都會拖低港鐵股價，但佢認為樓市問題已經反映咗喺港鐵股價上，再跌空間唔大，所以再盲目睇淡都冇意思。
Casper認為，加息周期已經完結，就算唔減息，市場情緒都已經冇以前咁悲觀，所以樓市未必會再大幅下滑。佢又話，港鐵股息率有5厘，算係有少少吸引力，亦唔可以同其他發展商比較，因爲港鐵有車費收入，加埋租金收入都算係穩定，唔使擔心基本面會顯著轉差。
