【Now財經台】截至早上11時止，1小時內《彭博》用戶搜尋量最多港股，依次為長實集團(01113)、東方海外國際(00316)、中國平安(02318)、中國移動(00941)及美高梅中國(02282)。
中移動及平保昨日(21日)先後放榜，其中，雖然去年平保新業務價值增長超預期，今季亦繼續維持良好增長，亦制定未來3年股東回報計劃，今年至2026年3個年度派息比率定於20%至50%，但股價今日(22日)都要捱沽。至於中移動季績差過預期，但派息比率上升，又有大行「祝福」，如果睇派息，係咪揀中資電訊股穩陣啲？
大華繼顯執行董事梁偉源指，喺幾隻大跌股之中，平保可以考慮吼低位撈底，原因係困擾集團兩大因素，即A股及內房情況其實喺農曆年後開始改善，估計今年表現會比去年更好，而新業務增長可帶動本業有改善空間，股價落到32元可分段小注買入。
Steven就話，中資電訊股係「中特估」嘅代表行業之一，中移動業務穩定，發展5.5G業務未涉及太大開支，盈利增長又維持到，派息比率亦有上升空間，加上發展人工智能(AI)及伺服器服務係一個亮點，所以中移動股價落65元至66元都可以考慮入手。
