【now.com財經】噚日揀咗隻恒指牛(51790)出嚟，計劃借小時圖畫出嚟嘅「三角形」，踩好底線+10線而出。等咗一個上半場都唔見踩到線，反過來仲要失線，唯有繼續等。
及至下半場開市後，見於小時圖上低位見16,452點出「平底」，10線擺位見16,518點。坦白講「平底」出現後指數抽高，反返去五分鐘圖上見100線前咬咗成35分鐘(7粒燭)咁滯，終於喺第8粒燭，即約1點45分見上破，同步亦踩返上小時10線之上，終於(51790)可以出場啦。
如常的用10分鐘作為出場時間，即於1點45分至1點55分期間落隻(51790)，按期內高低位做過0.045元/0.041元，即平均買入價為0.043元。
落場後見五分鐘圖保歷加通道口都開始有拓闊情況，而指數亦都一直貼住保歷加頂線上行。呢注好倉作戰室都有輕裝齊上路，事關向來下半場都係偏偏悶，所以都係輕裝穩陣啲。
去到2點35分，忽然喺五分鐘圖上見指數出支「大陽燭」，呢一下真係將指數喺小時圖重上20線不得止，仲一口氣上破100/150/50線三線。喺最後一個鐘嘅小時圖見指數重上五條主要平均線之上。
不過，去到最後一個鐘嘅3點20分，指數於高位16728點向下慢慢回落至失守10線，好倉唔過夜亦轉五分鐘圖拉量度線嘅話亦都可以選擇借失10線而離場。
同以10分鐘作為走貨時間計的話，期內(51790)高低位做過0.057元/0.052元，平均走貨價為0.0545元，呢一趟平均賺幅為11.5格或26.74%。
話咁快又到咗期結+季結日，都話咗呢啲日子無人講過一定會做好，更何況港股依家咁嘅身世，做好比邊個睇？甫開市跌87點後，到依家9點37分，跌幅已經擴大至跌161點，報16,454點；再比多兩分鐘連噚日低位「平底」位都失守埋，作戰室各位戰友手上嘅淡倉揸多一陣之後，見指數向下再挫失16,400點之後就紛紛收割，然後去開工。每日開市用首半個鐘執幾格之後就做嘢，搵到份零用又唔影響工作，搞到我都想同佢哋對調，嘿。
10點未到，恒指隨住騰訊(00700)倒升而將跌幅大為收窄，都有差不多縮咗成百點跌幅架，不過小時圖目前仍然見到保歷加通道口仍然收窄中。
去到10點打後見小時圖嘅保歷加通道口都仲係收窄，不過五分鐘圖已經見到指數觸底回升。中軸未到，作戰室反手好倉都等睇佢過唔過線。
兩手準備住先。中軸唔過嘅，恒指熊(53368)，收回價16800點，同現價都只係爭333點，所常近所以只係做day Trade，槓桿有約41.17倍，同一收回價中呢隻槓桿最高；如果過到線的話，咁就可以當佢由保歷加底線swing到上頂線，恒指牛(51777)，收回價16,188點，同現價有約335點距離，都係近嘢嚟嘅，槓桿有約42.37倍。
睇住條中軸線啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
