【Now財經台】碧桂園服務(06098)去年賺2.92億人仔，按年大跌85%，末期息相應按年大減逾80%至2.19分人仔，不過，集團繼續派特別息，仲較2022年同期增近20%至27.27分人仔。
碧服今次連特別息合共派29.46分人仔，已遠高於只有8.69分人仔嘅每股盈利(EPS)。不過，集團中午公布業績後，股價喺午後最多曾跌5%，曾低見5.24港元，莫非因為市場嫌派息少？
南華金融集團副總監莫灝楠認為，市場比較擔心物管板塊基本面轉差，雖然物管公司現金流相對好過發展商，但仍然需要為第三方欠下嘅應收款項做撥備，內房流動性問題一日未解決，物管股嘅純利表現都會大受拖累。佢又估計，碧服會加派特別息，可能係乘機派返啲現金俾作為大股東嘅母公司碧桂園(02007)去還債。
Casper續指，未來需要關注物管股毛利率及在管面積嘅增長放緩，因為公司唔可以再靠母企不斷起樓益自己人。
