【Now財經台】港股7月開局唔錯，但恒生指數今日(5日)一度挫逾200點，過去3日嘅升幅幾乎化灰，三中全會將會喺7月15日至18日召開，港股下周表現係咪唔使太擔心？指數成分股之中，暫時以美團(03690)升得最靚，值博率係咪最高？
冠域商業及經濟研究中心主任關焯照認為，恒指會有反彈，但如果期望有新一輪升勢就睇得太樂觀，最初市場對股息稅等政策有一定期望，但愈來愈覺得「冇乜嘢講」，所以恒指都由19700點水平回落至17700點水平，近期續受制18000關，市場會認為下星期會有風聲漏出嚟，借勢掃高恒指幾百點，估計會彈到18500點左右，市況唔會太差。
美團方面，關博士就話，年初跌到60幾蚊時，之後出現一個大浪，急升至130元水平，之後落返250天線，但冇跌穿，走勢仲強過騰訊控股(00700)，如果要推上去係比較易，因為業務能見度高，亦有做回購及業績有改善，亦留意到每當恒指「郁」，美團通常會行多啲。
