【Now財經台】資金近期重點追入高息股或「中特估」概念股，睇返6月高息股排行榜，排第1位嘅華潤電力(00836)累升約8.1%，其他高息股表現亦唔錯，資金偏好高息股有咩啟示？
香港大學房地產及建設系客席副教授楊書健指，高息環境對冇咁多資金嘅投資者嚟講係一個好機會，若可以做到債務紓緩計劃(DRP)及收息後再投資，上市公司容許投資者每季或每半年收息時，可以股代息，喺過去幾年嘅高息環境下，股息率高咗，自然可以儲到好多息。
例如，萬得澳大利亞高收益股票ETF(VHY)股價上上落落，2021年底至今，股價只升咗10%，相對其他歐美股市升幅唔多，但呢幾年派息派得多，盈利連股息已賺咗30%，本港高息股亦一樣，可以長揸未來5至10年公司業務唔會好大轉變嘅股份，股息高咗係儲錢嘅好時機。
Victor續指，可以用息率嚟揀高息股，買得高息股唔係旨在贏錢，最緊要係行業夠穩陣，包括公用股、地產股及銀行股，息賺最多嘅電能實業(00006)、長江基建(01038)等股份都有條件守住，等收6至7厘嘅股息。
