【Now財經台】百威亞太(01876)今日(1日)開市前出咗中期業績，期內銷量按年跌6.2%，收入及淨利都要跌，單計第2季，收入按季有得升，但盈利按季跌近9%，差過市場預期，業績係咪反映百威失咗增長動力？
艾德金融執行董事陳政深指，百威喺個別地方仍然做得唔錯，例如喺韓國嘅表現優於同業，收入及盈利雙升，所以韓國業務已算有交代，不過，韓國收入增長仍唔足以彌補內地銷售下滑嘅損失，所以百威呢份業績主要受內地銷售拖累，不論啤酒銷量及平均售價表現都唔理想，只錄得低單位數增長。
Ryan又話，百威連毛利率有些微增長都做唔到，的確令人失望，由於收入按年跌約11％，銷售成本亦相應下跌，就算有旗下高端品牌幫手，整體毛利率都冇明顯改善。
