【Now財經台】內銀股價今日(3日)幾乎全線向下，昨日(2日)逆市造好嘅農業銀行(01288)，今日都要回套，一度挫逾5%，低見3.35元。摩根大通指，內銀季績大致符合預期，但預期股價未來兩個月會走弱，主要係業績觸發市場對淨息差、借貸成本等憂慮。內銀股出現調整，係咪反映部分投資「中特估」概念股嘅資金食糊離場？
華盛證券財富管理部董事李偉傑估計，內銀股短期仍有調整壓力，股價跌主要係今年升得太多，上到高位冇新消息支持股價再上。佢又話，大部分內銀收入及盈利都微跌，僅農行表現較好，派中期息及不良貸款率下降係正面消息，但派中期息其實只係拆開嚟派，由於利好消息盡出，股價上到高位已經冇上升動力，所以就出現調整壓力。另一方面，市傳內地准業主做轉按，如果屬實會直接影響內銀淨息差，亦令唔少投資者趁高獲利離場。
揀股方面，Jason話，內銀股首選中國銀行(03988)，其次係農行。
