【Now財經台】康方生物(09926)自主研發用於治療局部晚期，或非小細胞肺癌嘅創新藥「依沃西」，雖然係7月底獲國家藥監局受理上市，但集團中期業績仍由盈轉虧，但投資者似乎仍對公司有憧憬。
亨達財富管理董事總經理姚浩然指出，藥企最緊要有新藥推出，又認為「依沃西」可以令康方業績有改善，「依沃西」開始喺國際市場見到成績，加上藥物成功研發後，主要支出只跟銷售有關，毋須再投入大量研發資金，因此，就算中期業績轉蝕，投資者都對康方有憧憬。
不過，Patrick提醒，投資者未來要留意「依沃西」實際銷售及收益，又指康方上半年「見紅」主要係許可費減少，實際上產品銷售係有增加。
