【Now財經台】港股近排走勢反覆，美股都唔例外，雖然晶片股受荷蘭光刻機巨頭艾斯摩爾(ASML)拖累，但蘋果公司(Apple Inc.)昨晚(15日)再破頂，主要係市場睇好集團未來可受惠於推出人工智能(AI)iPhone，不過，港股嘅Apple概念股就個別發展，其中，比亞迪電子(00285)和瑞聲科技(02018)股價今日(16日)都要跌，Apple隔晚破頂算唔算有驚喜？
南華金融集團副總裁莫灝楠指，其實Apple最新推出嘅產品刺激作用唔大，技術上亦冇太大突破，但Apple品牌效應太大，顧客黏度又高，即使推出冇新意嘅產品，「果粉」仍會捧場，Apple係一家強勁嘅科技及消費品企業，毛利率高，所以股價破頂係理所當然。
至於手機設備股點解炒唔起，佢就話，手機設備股要炒返上去，要睇產品整體嘅產量可唔可以大幅增加，繼而推高銷量及毛利率，不過，呢類公司之間有激烈嘅價格戰，短線都唔建議揀呢類股。
