【Now財經台】中美近排在晶片、晶片原材料等貿易議題上再次針鋒相對，SaaS(軟件即服務)概念股已經好耐冇炒起，但今日(4日)部分突然「落鑊」，其中，金山雲(03896)一度大升逾10%，呢類公司近期唔少宣布「轉跑道」，轉戰人工智能(AI)，唔少SaaS概念股嘅股價已跌到好殘，依家搵到AI賽道，會唔會係一個亮點？
南華金融集團副總裁莫灝楠認為，SaaS概念股轉去AI跑道，唔多唔少都係一個亮點，市場對呢類股份有幾個諗法，首先係市場由硬件轉換到應用，企業軟件公司可能會推新產品，客戶需要畀多啲錢買新產品，或者為原有產品增值，其次係依家推一啲App出嚟，有咗AI可以好快處理一啲文書及勞動密集型嘅工作，可以提升呢啲SasS公司嘅效率。
Casper又指，內地AI或SaaS股本身已有天生嘅缺陷，最大問題係中國晶片及半導體受到制裁，如果需要AI模型好自然會聯想到阿里巴巴(09988)及百度集團(09888)，但呢啲公司好多都買唔到外國晶片，又或者分配數量唔夠，就導致呢啲公司喺AI運算及AI模型，都落後於外國嘅ChatGPT等運算模型，所以外國呢類公司係有競爭優勢，所以內地相關企業要扭轉經營慘況絕對唔易。
