【Now財經台】ESR(01821)今早(5日)復牌，高開近5%後，升幅一度略為擴大至6.6%，高見12.2元，成交較過去100日平均激增48倍，暫時成交金額逾4億元，但成交主要集中喺開市早段，中午前成交相對淡靜。
公司終於敲定私有化方案，由喜達屋牽頭嘅財團提出以每股13元私有化ESR，但講明呢個已經係終極方案，即係唔會加價，股東可以揀現金或1換1 Equity Co股份，不過，有唔少主要股東都就同意賣股作出不可撤回承諾，涉及逾30%股權。
最後就要睇小股東呢關，私有價較停牌前有逾13%溢價，但股價去年開始已失守上市價16.8元，計埋上市至只派過0.5元息，如果小股東由上市揸到依家，最終以13元賣返啲股份畀公司都係要輸錢。
