【Now財經台】平安好醫生(01833)今日(6日)除淨，派咗9.7元特別息，股價一度升逾24%，高見6.68元，成交股數較過去100日同時段平均大增23倍。
平醫今日價量齊升，主要係市場炒件大股東或因「以股代息」觸發全購，其實公司上月中宣布派特息時提及，若中國平安(02318)附屬安鑫選擇以股代息就會觸發全購。
不過，平保一直冇表過態到底要錢還是要股，但平醫每股資產淨值(NAV)約13元，遠高於現價，加上公司近年業績及前景真係麻麻，2018年上市至2023年期間，每年最少蝕幾億元，不過，今年上半年終於有錢賺，錄得盈利5665萬元，公司都好識做即刻回饋股東，因此，就算平保真係想趁機增持平醫，都未必會出高價，後市要留意平保有冇主動公布最終揀乜嘢，否則，要等到明年1月24日派息時先知。
