【Now財經台】港股今早(15日)走勢反覆，但優必選(09880)股價強勢，一度高見55.05元，大升逾15%，其後升幅收窄，但維持約10%升幅，股價今日大升應該同一單消息有關，集團同富士康就人形機械人喺智能製造領域應用，建立全方位長期戰略合作關係，開展人形機械人喺真實製造場景、測試驗證及技術創新工作。
優必選依家已經同比亞迪股份(01211)、吉利汽車(00175)、順豐控股(06936)等大企業有合作，依家又同富士康合作，有利業務前景，不過，公司暫時仲未有錢賺，暫時亦畀唔到市場一個目標，加上近期有股東減持，不利股價，2024年12月禁售期一到，即時有沽壓，其中，騰訊控股(00700)今個月初曾大手減持。
優必選股價周一(13日)曾創40.8元上市新低，雖然今日借同富士康合作消息連續第2日反彈，但股價距離禁售期完結前水平仲相差一大截，相信係繼續受股東減持陰霾困擾，亦關注集團幾時先有錢賺。
