【Now財經台】內地農曆年假期間，電影《哪吒之魔童鬧海》票房破晒紀錄，但港股嘅影視相關股今日(12日)先有異動，例如阿里影業(01060)及貓眼娛樂(01896)，今日大升8%及12%，點解依家先「追落後」？呢浸可以炒幾耐？
艾德金融執行董事陳政深指，始終資金會喺股市輪動，亦要比個理由資金流入某類股份，而《哪吒2》相關嘅A股已經炒咗幾日，已反映賀歲片檔期票房破紀錄因素，只係好少港股會直接受惠於《哪吒2》票房報捷，所以市場都要花啲心機去尋寶，導致有少少滯後嘅情況。
Ryan續指，《哪吒2》呢類依靠科技及電腦合成影像(CG)動畫製作嘅電影，佢估計，除咗直接受惠嘅股份外，有相關憧憬嘅股份對資金都會有吸引力，不過，呢類股份同時都受惠於科技概念或人工智能(AI)概念，所以不論賀歲檔期後，或依家有少少滯後嘅資金，都見到係相對短線嘅流入，唔同AI熱潮下嘅炒作，所以炒作唔會太耐。
