【Now財經台】澳門2月賭收按年升6.8%，遠超預期，賭股今早(3日)造好，其中，金沙中國(01928)股價今朝高開1%後，升幅一度擴大至5.5%，高見18.78元，衝上1個月高位。依家金沙只有CALL輪可以揀，雖然部分產品做到10倍槓桿以上，但相當短身，仲有10幾日就到期，會唔會太進取？
中信證券國際股權衍生品銷售經理李碧珊指，雖然金沙今朝升得唔錯，但今年走勢大幅跑輸恒生指數，資金可能傾向做積極部署，博金沙短線可以借澳門賭收數據或業績推升股價。
Percy提醒，仲有10幾日就到期嘅CALL太過進取，屬於高風險選擇，如果已買入嘅投資者要留意發行商開價嘅積極性，有機會因為對冲難度增加令發行商買賣差價擴闊。
佢建議，有興趣嘅投資者可以揀返啲中年期嘅CALL，今年8月至9月到期，價外10%至30%，對冲值維持喺0.3以上，實際槓桿有5倍以上。
