【Now財經台】雖然最近核心人工智能(AI)股升勢放緩，但唔少相關行業氣氛仍然熾熱，AI相關股估值修復完成後，其他周邊行業有冇機會獲得估值上調？未來會唔會有大量新資金湧入AI周邊新興產業？
思睿集團首席經濟學家洪灝表示，今輪AI股升勢帶動成個科技板塊向上，而科技板塊有好多權重股，所以亦帶動恒生指數向上，不過，呢類實際做AI嘅公司其實好難賺錢，例如DeepSeek，雖然爆紅但其實都未有盈利，反而通常都係一啲喺產業鏈上游嘅公司受惠，例如英偉達(Nvidia)等提供晶片及技術嘅公司會有錢賺。
佢又話，DeepSeek嘅出現令一啲內地芯片公司憧憬未來可以用較低端嘅芯片提供AI服務，從而增加潛在收入，但到底下游邊間公司賺緊錢，佢認為，會有利阿里巴巴(09988)阿里雲計算及騰訊控股(00700)騰訊雲大幅增長，但最後係咪真正能夠帶嚟盈利增長，仍然係未知數。
