【Now財經台】恒安國際(01044)今日(25日)出咗業績，去年少賺18%至23億人仔，收入按年跌近5%，若拆開上下半年睇，去年上半年賺14億人仔，即係下半年只賺9億人仔，全年毛利率都要跌，點睇呢份業績？
天風國際證券經紀業務部董事李偉傑指，恒安呢份業績係受成本開支拖累，因為去年紙巾原材料木漿價格偏高，加上推廣開支增加，導致毛利率受壓。
Jason續指，市場主要睇恒安3大業務，即紙巾、衛生巾及紙尿褲，其中，當中紙巾業務受壓情況最明顯，始終行業間業務競爭劇烈。此外，集團過去推出好多新產品，希望支持高端產品毛利率，但都要消費者持續購買，或用戶信心度持續提升，毛利持先有機會持續提升。
佢又話，受惠於銀髮經濟，今次睇到紙尿褲及長者相關業務增速加快，Jason相信，恒安可以維持到派息水平，有助增強股東持貨耐性。
