【Now財經台】截至早上11時止，1小時內《彭博》用戶搜尋量最多嘅港股，依次為小米集團(01810)、紫金礦業(02899)、阿里健康(00214)、中國信達(01359)及百濟神州(06160)。
小米昨晚(26日)舉行發布會，集團首架SUV YU7預售反應熱烈，刺激股價今早(27日)開市即破頂，一度高見61.45元，大升近8%，但之後企唔穩60元關口，YU7基本版定價平過SU7，有好大競爭力，理想汽車(02015)、小鵬汽車(09868)等車股股價今朝都要跌。此外，大行對YU7亦睇得好正面，認為銷售反應好大機會超出市場預期，但暫時未見銷售、毛利率預測等數據，點睇YU7銷售表現？
大華繼顯執行董事梁偉源指，YU7功能及售價都係主打高性價比，售價成功吸引市場關注，導致其他車股股價今日都要跌，但值得留意係，預訂嘅定單之後其實可以取消，所以要等確實銷售數據公布後先可以作準。
佢又指，小米表示，早前預訂SU7嘅客人有機會轉買YU7，雖然可能會影響SU7需求，但整體嚟講兩款車都好有競爭力，可望喺市場中突圍。
