【Now財經台】本港上市嘅「私人飛機第一股」西銳(02507)今日(18日)高開逾1%後，升幅一度擴大至逾17%，高位見75.65元，創新高，午後仍可維持逾10%升幅，收市報73.1元，大升逾13%，全日成交金額近5.4億元。
西銳股價已連升4個交易日，基本面亦唔錯，主要收入來源係銷售私人飛機及相關服務，純利持續穩步增長，去年賺1.2億美元，收入就按年增長12%，毛利率升至約34.5%。
公司將會喺下周二(26日)出業績，股價今日大幅炒上，相信係炒業績憧憬，亦反映資金可能正逐步分散至基本面唔錯嘅股份，不過，要留意股價今日破頂，雖然上方冇蟹貨，但14天相對強弱指數(RSI)已升至85水平，憧憬業績嘅同時都要小心。
