【Now財經台】截至早上11時止，1小時內《彭博》用戶搜尋量最多港股，依次為友邦集團(01299)、泡泡瑪特(09992)、眾安在綫(06060)、小米集團(01810)及港交所(00388)。
友邦今日(21日)出咗業績，中期新業務價值增長14%，創新高，派息增10%，每股派49港仙，不過，上半年少賺23%，主要受累保險合約財務開支大增近17億元，以及期內短期投資及貼現率差異，包括錄得7.54億美元物業重估虧損，加上內地新業務價值跌4%，呢份業績好壞參半，最大憂慮係咪內地新業務價值？友邦股價業績後受壓，20天線守唔守得住？
香港股票分析師協會副主席曾永堅指，友邦喺營運及其他方面都交足功課，增長動力仍然存在，唯獨內地新業務價值令人失望，始終友邦過去致力開拓內地市場，市場十分關注友邦內地業務幾時先恢復增長。
股價方面，佢指出，友邦股價4月至今持續上升，相信已反映業績預期，但仍需時消化內地業務表現唔理想，估計短線會出現回調，如果喺71元搵到支持，股價有機會再向上。
