【財經TOP SEARCH】買美團等落返呢個位

【Now財經台】截至早上11時止，1小時內《彭博》用戶搜尋量最多港股，依次為美團(03690)、中國海洋石油(00883)、比亞迪股份(01211)、領展房產基金(00823)及新世界發展(00017)。

美團自上周一(9日)政治局開會以來跑輸其他內需股，累跌逾8%，今日(17日)股價一度跌逾2%，低見155.6元。沃爾瑪中國(Walmart China)發公告指，跟美團達成戰略合作，全國沃爾瑪門店已全面上線美團，並接入美團配送。美團旗下本身有社區電商平台「美團優選」，今次嘅合作對美團有幾大幫助？

富途證券首席分析師譚智樂指，因為美團本身已經有相關業務，所以對股價嘅正面幫助唔大。上周政治局會議後，消費股明顯有沽壓，市場都係等刺激消費政策出台，呢啲股份先有條件拉升估值。另外，美團業績表現唔差，收入、盈利增長都好過預期，但利潤率嘅壓力非常明顯，喺經濟仍然疲弱下，單靠利好消息並唔足夠支撐股價。

Arnold又話，現時股價與大市同步，有貨嘅投資者可以繼續持有，但市況未有進一步利好消息，股價可能會跟隨大市下跌，冇貨嘅投資者可以等回落至100天線先入場。