【Now財經台】長江基建(01038)輕微低開後中午前現沽壓，跌幅逐步擴大，午後最多跌超過4%，低見42.25元，成交股數較過去100日同時段平均增加近2倍。
消息面方面，長和系股東架構有調整，李嘉誠將部分持股轉移至家族信託，信託的股份名單當中就冇長建，但主席仍然唱好，相信今日跌幅同基本因素變動無關。同系電能實業(00006)同樣今日除淨，跌幅相對較少，但兩隻同系除淨股份今日暫時藍籌當中包尾，反映除淨因素今日影響都幾大。
技術方面，日線圖睇到長建今日受壓只係回套返上月尾今月初公用股炒上個段升幅，而低位仍然守喺今年初以嚟大部分時間嘅橫行區位置，同時係50天線，喺大約42.2位置有支持位。建議投資者留意聽日長和(00001)同長實(01113)除淨，睇下股價會唔會受到除淨因素影響而出現異動。
