【Now財經台】2024年開局至今，具防守性嘅高息股更受投資者青睞，今年5大升幅藍籌中，4隻係高息股，其中，排第1位嘅中國神華(01088)股價已連升3年，今日(10日)更升至近10年高位，見28.95元。
南華金融集團副總監莫灝楠表示，神華喺27元水平已形成非常大嘅支持，加上升咗咁耐股息率仍高達10厘，相信後市走勢繼續強勁，建議等股價喺高位稍微盤整(correction)，跌1至2元後考慮吸納。
Casper又指，有兩個原因令神華明顯跑出，首先係多元業務支持神華成為「現金牛」，有穩定盈利並長期派息，以煤炭同電力業務為例，集團可以喺內部對沖旗下商品嘅風險，煤炭價格下跌，反而有利火電部門降低發電成本，繼而令利潤上升，因此，神華股價跟煤價上落之際，整體走勢穩陣過兗礦能源(01171)等同業。此外，集團有議價能力確保盈利穩定，資源業務喺現時經濟下都加到價。
