【Now財經台】泡泡瑪特(09992)股價今早(21日)早段曾短暫向下，但之後掉頭向上，並愈升愈有，尾市一度高見80.75元，升5.2%，收市報80.25元，升4.6%。
泡泡瑪特早前受股東減持影響，近日調整完再發力，市值最新已突破1000億元，明日(22日)就恒指季檢嘅大日子，可能市場睇好泡泡瑪特係「染藍」大熱，最新市值已超越近半藍籌。
泡泡瑪特股價今年已累升超過3倍，絕對係強勢股，因為基本面好，業績又強勁，第3季收入按年大增逾1.2倍，海外收入更增長4倍。不過，出完第3季業績後，大股東即刻減持，套現16億元。
大行繼續睇好泡泡瑪特，富瑞、中金、摩根士丹利、中信里昂及德意志銀行等，目標價已睇到80元以上，其實已經到價，睇得最牛嘅德意志，目標價88元，距離現價仲有約10％上升空間。
