【Now財經台】兩隻內需股蒙牛乳業(02319)及蜜雪集團(02097)都出咗業績，雖然蒙牛毛利率升2.4個百分點至39.6%，但盈利大幅倒退98%，收入亦差過預期，雖然蜜雪核心產品價格低，但去年多賺逾40%，毛利率升至31.6%，點睇呢兩份業績？
艾德金融執行董事陳政深認為，蒙牛股價已反映公司派息比率情況，蒙牛去年派息比率逾40%，集團亦有解釋呢個數字已撇除非現金虧損，所以股東會較安心。此外，由於市場對內需股政策及消息有一定憧憬，所以公司股價做得較好。不過，Ryan指，蒙牛毛利率上升只係反映上游產品原材料價格下跌，亦意味消費者需求減少，內需市場唔樂觀，整體而言，蒙牛呢份業績唔算好。
至於蜜雪上市後第一份成績表，Ryan就話，收入按年增長22%，利潤按年增長近40%，呢份業績已交到貨。佢續指，雖然投資者經常直接將集團連結到蜜雪冰城嘅茶飲非常平，但令盈利水平都可以咁強，佢提醒，唔好忽略蜜雪亦透過銷售經營所用嘅機械及原材料賺取盈利，相信係集團呢兩部分成本控制得好，令盈利能力有所提升。
