【Now財經台】截至早上11時止，1小時內《彭博》用戶搜尋量最多港股，依次為美團(03690)、銀河娛樂(00027)、金沙中國(01928)、長和(00001)及騰訊控股(00700)。
雖然美團連日做回購，但股價仍未能止跌，今朝(25日)一度挫逾5%，低見106.8元，失守100天線，距離下方250天線都已經好近，後市會唔會連前低位都守唔住？
信達國際研究部助理經理陳樂怡指，近期唔少科技股透過回購穩定股價，依家最重要都係睇減息，但減息時間仍然唔明朗，而美國近期公布嘅經濟數據，反映當地經濟仍好有韌性。
基本面方面，喺消費氣氛低迷下，外賣業務要靠低價吸客，所以預期單價會下調，集團未來業務策略方面，未必會增加外賣補貼，反而會追求盈利能力。
Tracy又話，美團下個月會出業績，要留意到時有冇驚喜，由於依家係「靜默期」，市場唔會有太多消息，股價好大機會跟大市行，所以美團有機會下試之前低位。
