【Now財經台】截至早上11時止，1小時內《彭博》用戶關注度上升最多首5隻港股，依次為舜宇光學(02382)、騰訊控股(00700)、萬科企業(02202)、復星國際(00656)、港交所(00388)。
至於第6至10位，依次為中國銀行(03988)、永利澳門(01128)、快手(01024)、新世界發展(00017)、建設銀行(00939)。
隔晚巴克萊銀行(Barclays)因為唔睇好iPhone需求前景，而下調蘋果公司(Apple)美股評級至「減持」，拖累蘋果股價收市跌3%。今朝港股入面，蘋果供應鏈相關企業嘅股價普遍向下，其中舜宇低開逾1%後，曾急插4%，低見64.65元。
資深證券分析師彭偉新認為，內地以往係蘋果其中一個主要市場，但當地經濟緩慢復甦，加上最新推出嘅iPhone 15性能同硬件配置冇大升級，自然刺激唔到一般消費者去換機。
不過，Castor指出，舜宇唔係主力供貨畀蘋果，iPhone嘅需求前景唔好對公司嘅影響相對較小，而公司股價已經回落到100天線附近，佢預期投資者唔會希望股價跌穿，相信消息觸發唔到新沽壓，舜宇短線有機會企穩返。
